ໃນລະຫວ່າງວັນທີ 3-5 ກັນຍາ 2024, ພະແນກເຕັກໂນໂລຊີ ແລະ ການສື່ສານ ແຂວງຄຳມ່ວນ, ໄດ້ຈັດຊຸດຝຶກອົບຮົມການສ້າງ ແລະ ການບໍລິຫານຈັດການເວບໄຊ ດ້ວຍລະບົບເວບໄຊພາກລັດ (G-Web Platform) ໃຫ້ກັບພະນັກງານ 09 ຂະແໜງຂອງແຂວງ ແລະ ຂັ້ນເມືອງ ຊຸດທີ II, ທີ່ເມືອງນາກາຍ ແຂວງຄຳມ່ວນ, ເຊິ່ງໂຄງການດັ່ງກ່າວໄດ້ຮັບການສະໜັບສະໜູບຈາກ ແຜນພັດທະນະທ້ອງຖິ່ນ LAO/338 (LDP) ປະຈຳແຂວງຄຳມ່ວນ, ໂດຍການເປັນປະທານຂອງທ່ານ ດາວໄຫຼ ແກ້ວດວງດີ ຮອງຫົວໜ້າພະແນກເຕັກໂນໂລຊີ ແລະ ການສື່ສານ ໃຫ້ກຽດເຂົ້າຮ່ວມໃນການເປີດພິທີຝຶກອົບຮົມ, ໂດຍມີຜູ້ເຂົ້າຮ່ວມທັງໝົດຈຳນວນ 25 ທ່ານ ຍິງ 6 ທ່ານ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ ກໍ່ເພື່ອເປັນການຍົກລະດັບຄວາມຮູ້ຄວາມສາມາດ ແລະ ເປັນການສ້າງຄວາມເຂັ້ມແຂງດ້ານວິຊາການໃຫ້ແກ່ພະນັກງານຈາກຂະແໜງການຕ່າງໆພາຍໃນແຂວງ ໃຫ້ສາມາດສ້າງ ແລະ ພັດທະນາເວັບໄຊ ຂອງຂະແໜງການຕົນໄດ້ດ້ວຍລະບົບເວບໄຊພາກລັດ (G-Web Platform) ເພື່ອນຳໃຊ້ເຂົ້າໃນວຽກງານການບໍລິການດ້ານຂໍ້ມູນຂ່າວສານໃຫ້ແກ່ສັງຄົມຢ່າງກວ້າງຂວາງ, ພ້ອມທັງເປັນການຊຸກຍູ້ສົ່ງເສີມວຽກງານການຫັນເປັນດິຈິຕອນຂອງແຂວງໃນຕໍ່ໜ້າ.

ກອງປະຊຸມຝຶກອົບຮົມໄດ້ດຳເນີນເປັນເວລາ 03 ແລະໄດ້ສຳເລັດລົງໃນວັນທີ 5/09/2024 ເຊິ່ງໃນຕອນທ້າຍຂອງກອງປະຊຸມ ທ່ານ ດາວໄຫຼ ແກ້ວດວງດີ ຮອງຫົວໜ້າພະແນກເຕັກໂນໂລຊີ ແລະ ການສື່ສານ ກໍ່ໄດ້ເຂົ້າຮ່ວມກອງປະຊຸມສະຫຼຸບ ແລະ ມອບໃບຢັ້ງຢືນການຝຶກອົບຮົມການສ້າງ ແລະ ການບໍລິຫານຈັດການເວບໄຊ ດ້ວຍລະບົບເວບໄຊພາກລັດ (G-Web Platform) ຊຸດທີ II, ເຊິ່ງໃນກອງປະຊຸມທ່ານ ທ່ານ ດາວໄຫຼ ແກ້ວດວງດີ ກໍ່ໄດ້ມີຄຳເຫັນຕໍ່ກອງປະຊຸມ ແລະ ໄດ້ຮຽກຮ້ອງໃຫ້ນັກສຳມະນາກອນທີ່ເຂົ້າການຝຶກອົບຮົມທຸກທ່ານ ຈົ່ງນໍາເອົາຄວາມຮູ້, ບົດຮຽນ ແລະ ເຕັກນິກໃໝ່ໆຈາກນັກວິທະຍາກອນ, ເພື່ອນຳໄປສຶບຕໍ່ຜັນຂະຫຍາຍເຂົ້າສູ່ວຽກງານຕົວຈິງ ແລະ ປະກອບເຂົ້າໃນການພັດທະນາວຽກງານຂອງຕົນ ໃຫ້ມີປະສິດທິຜົນ ແລະ ມີປະສິດທິພາບ, ໃນການບໍລິການດ້ານຂໍ້ມູນຂ່າວສານຂອງຂະແໜງຕົນເອງ ໃຫ້ປະຊາຊົນສາມາດເຂົ້າເຖິງຂໍ້ມູນພາກລັດໄດ້ຢ່າງສະດວກ ແລະ ມີຄວາມປອດໄພ.