ໃນຕອນເຊົ້າ ເວລາ 8:00 ນາທີ ຂອງວັນທີ 25ຕຸລາ 2024 ທີ່ຜ່ານມາ, ຢູ່ທີ່ຫ້ອງປະຊຸມ ຫ້ອງວ່າການເມືອງວັງວຽງ, ແຂວງວຽງຈັນ, ຄະນະຜູ້ແທນທັງ 05 ແຂວງ ລະຫວ່າງພະແນກເຕັກໂນໂລຊີ ແລະ ການສື່ສານແຂວງ ວຽງຈັນ, ໄຊສົມບູນ, ຄໍາມ່ວນ, ບໍລິຄຳໄຊ ແລະ ນະຄອນຫຼວງວຽງຈັນ ໄດ້ຈັດກອງປະຊຸມພົບປະ ແລະ ແລກປ່ຽນບົດຮຽນຮ່ວມກັນ. ໂດຍໃຫ້ກຽດເປັນປະທານຮ່ວມ ທ່ານ ພົມມະລາ ນັນທະວົງ ຫົວຫນ້າພະແນກ ຕສ ແຂວງວຽງຈັນ, ທ່ານ ລັງສີ ແກ້ວວິເສດ ຫົວຫນ້າພະແນກ ຕສ ບໍລິຄຳໄຊ, , ທ່ານ ດົວຊົງ ເລ່ຍໂກ້ ຫົວຫນ້າພະແນກ ຕສ ແຂວງ ໄຊສົມບູນ , ທ່ານ ຫວາດ ອີນຄໍາວົງ ຫົວຫນ້າພະແນກ ຕສ ແຂວງຄໍາມ່ວນ ແລະ ທ່ານ ມະນໍລິນ ພິລະວົງ ຮອງຫົວໜ້າພະແນກເຄັກໂນໂລຊີ ແລະ ການສື່ສານ ນະຄອນຫຼວງວຽງຈັນ, ນອກນັ້ນຍັງມີ ບັນດາຮອງຫົວຫນ້າພະແນກ, ຫົວຫນ້າ, ຮອງຫົວຫນ້າຂະແຫນງ ແລະ ພະນັກງານວິຊາການ ພະແນກ ຕສ 05 ແຂວງພາກກາງ ເຂົ້າຮ່ວມທັງໝົດ 106 ທ່ານ,ຍິງ 31 ທ່ານ.

ຈຸດປະສົງກອງປະຊຸມໃນຄັ້ງນີ້ ໃນການພົບປະແລກປ່ຽນບົດຮຽນໃນຄັ້ງນີ້ ຜູ້ເຂົ້າຮ່ວມກອງປະຊຸມທັງ 05 ແຂວງ ກໍໄດ້ລາຍງານກ່ຽວກັບສະພາບ ການຈັດຕັ້ງປະຕິບັດວຽກງານເຕັກໂນໂລຊີ ແລະ ການສື່ສານ ໃນໄລຍະຜ່ານມາເຊັ່ນ: ບັນຫາຂອງ 3 ເສົາຄໍ້າຍຸດທະສາດ ເປັນລັດຖະບານດີຈິຕອນ, ບັນຫາວຽກງານອິນເຕີເນັດ, ການເຄື່ອນໄຫວວຽກງານເຕັກໂນໂລຊີ ແລະ ນະວັດຕະກຳ, ການຖອດຖອນບົດຮຽນແລກປ່ຽນຄວາມຮູ້ກັນລະຫວ່າງແຂວງ, ບັນຫາປະກົດການຫຍໍ້ທໍ້ໃນການຕິດຕັ້ງເສົາ BTS ແລະ ການປະສານພົວພັນວຽກງານລະຫວ່າງພະແນກ ຕສ ແຂວງ ກັບ ບໍລິສັດໄປສະນີ, ໂທລະຄົມມະນາຄົມສາຂາແຂວງ. ຜ່ານການພົບປະແລກປ່ຽນບົດຮຽນຕົວຈິງ ຜູ້ເຂົ້າຮ່ວມກອງປະຊຸມທັງ 05 ແຂວງ ໄດ້ປຶກສາຫາລືແລກປ່ຽນກັນຢ່າງ ກົງໄປກົງມາບົນພື້ນຖານຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຂົ້າໃຈກັນ ແລະ ພ້ອມກັນຕົກລົງເຫັນດີເປັນ ເອກະພາບ ບັນດາເນື້ອໃນການພົບປະແລກປ່ຽນກັນໃນຕໍ່ໜ້າ ຄືດັ່ງນີ້:ກໍ່ເພື່ອພົບປະແລກປ່ຽນບົດຮຽນຕົວຈິງ,

ຍັງມີການລາຍງານກ່ຽວກັບສະພາບ ການເຄື່ອນໄຫວຈັດຕັ້ງປະຕິບັດວຽກງານເຕັກໂນໂລຊີ ແລະ ການສື່ສານ ຂອງແຂວງຕົນເອງ ນອກນັ້ນຄະນະຜູ້ແທນທັງ 05 ແຂວງ ໄດ້ປຶກສາຫາລືຢ່າງກົງໄປກົງມາ ບົນພື້ນຖານຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຂົ້າໃຈກັນ ແລະ ພ້ອມກັນຕົກລົງເຫັນດີເປັນເອກະພາບ ບັນດາເນື້ອໃນການພົບປະແລກປ່ຽນກັນໃນຕໍ່ຫນ້າ ຄືດັ່ງນີ້: 1. ສືບຕໍ່ສ້າງສາຍພົວພັນການຮ່ວມມືໃນການແລກປ່ຽນບົດຮຽນເພື່ອຖອດຖອນບົດຮຽນທາງດ້ານວິຊາການ ລະຫວ່າງ 5 ແຂວງວຽງຈັນ, ບໍລິຄໍາໄຊ, ຄໍາມ່ວນ, ໄຊສົມບູນ ແລະ ນະຄອນຫຼວງ; 2. ເຫັນດີສະເໜີຕໍ່ຂັ້ນເທິງ ເພື່ອໃຫ້ສືບຕໍ່ໃນການເຄື່ອນໄຫວຽກງານອິນເຕີເນັດຢູ່ພາຍໃນແຂວງຕໍ່ໄປ ແລະ ເຫັນດີ ໃນການແລກປ່ຽນບົດຮຽນຕໍ່ໜ້າ ໃຫ້ສະເໜີຫ້ອງການກະຊວງ ຕສ ເຂົ້າຮ່ວມກອງປະຊຸມແລກປ່ຽນຮ່ວມກັບພະແນກ ຕສ ແຂວງ ເພື່ອນໍາເອົາເນື້ອໃນຈາກກອງປະຊຸມໄປນໍາສະເໜີຕໍ່ການນໍາກະຊວງ; 3. ເຫັນດີ ໃນການແລກປ່ຽນບົດຮຽນແມ່ນໃຫ້ຕັ້ງກຸ່ມວອດແອັບອອກເປັນ 2 ກຸ່ມເຊັ່ນ: ກຸ່ມຄະນະພະແນກ ຕສ ແຂວງ ໂດຍມີບັນດາບໍລິສັດ ແລະ ກຸ່ມພະນັກງານວິຊາການຂອງແຕ່ລະແຂວງ 4. ເຫັນດີໃຫ້ພະນັກງານວິຊາການ ເປີດກອງປະຊຸມຝຶກອົບຮົມໄລຍະສັ້ນຮ່ວມກັນ ເພື່ອເປັນການແລກປ່ຽນບົດຮຽນ ເຊິ່ງກັນ ແລະ ກັນ; 5. ເຫັນດີຖ້າມີການແລກປ່ຽນບົດຮຽນໃນຄັ້ງໜ້າແມ່ນໃຫ້ ພະນກ ຕສ ແຂວງ ທີ່ຈະເຂົ້າຮ່ວມໃຫ້ສົ່ງຫົວຂໍ້ວຽກງານ ທີ່ພົ້ນເດັ່ນຂອງຕົນໃຫ້ແຂວງເຈົ້າພາບສະຫຼຸບສັງລວມ ເພື່ອລາຍງານຕໍ່ກອງປະຊຸມແລ້ວໃຫ້ບັນດາແຂວງທີ່ເຂົ້າຮ່ວມປະ ກອບຄໍາຄິດຄໍາເຫັນໃສ່ບົດສະຫຼຸບດັ່ງກ່າວ; 6. ພະແນກເຕັກໂນໂລຊີ ແລະ ການສື່ສານ 06 ແຂວງ ພົບປະແລກປ່ຽນບົດຮຽນຕາມຮູບການຜັດປ່ຽນການຈັດຕັ້ງ 01 ປີ/ຄັ້ງ ( ຈັດຢູ່ໃນລະຫວ່າງເດືອນ ຕຸລາ-ທັນວາ), ກຳນົດຜູ້ເຂົ້າຮ່ວມແຕ່ລະແຂວງ 15-20 ຄົນ/ຄະນະ, ໄລຍະ ແລກປ່ຽນບົດຮຽນແຕ່ລະຄັ້ງແມ່ນ 1 ວັນ. 7. ເຫັນດີເປັນເຈົ້າພາບຈັດກອງປະຊຸມແລກປ່ຽນວຽກງານເຕັກໂນໂລຊີ ແລະ ການສື່ສານ ປີ 2025 ແມ່ນ ແຂວງຄໍາມ່ວນ ເປັນເຈົ້າພາບ, ສ່ວນສີເສື້ອ ແມ່ນກໍານົດໃຫ້ໃສ່ສີຂາວງາຊ້າງຂອງພະແນກເຕັກໂນໂລຊີ ແລະ ການສື່ສານ ທັງ 05ແຂວງ;

ໃນຕອນທ້າຍຂອງກອງປະຊຸມ ຄະນະຜູ້ແທນທັງ 05 ແຂວງ ກໍ່ໄດ້ມີການເຊັນບົດບັນທຶກຮ່ວມກັນເພື່ອຕົກລົງເຫັນດີເປັນເອກະພາບ ບັນດາເນື້ອໃນການພົບປະແລກປ່ຽນທີ່ກ່າວມາຂ້າງເທິງນັ້ນ ແລະ ກອງປະຊຸມໄດ້ຕົກລົງເຫັນດີເປັນເອກະພາບ ເຈົ້າພາບຈັດກອງປະຊຸມແລກປ່ຽນວຽກງານເຕັກໂນໂລຊີ ແລະ ການສື່ສານ 05 ແຂວງພາກກາງໃນປີ 2025 ແມ່ນແຂວງຄຳມ່ວນເປັນເຈົ້າພາບ ແລະ ກອງປະຊຸມໄດ້ປິດລົງໃນວັນດຽວກັນ.